حکومەتی هەرێمی كوردستان
SAT, 20 JUL 2019 18:40 Erbil, GMT +3




Important notice: This is KRG's old cabinet website.
For updated information about Kurdistan Regional Government
visit GOV.KRD please

نێچیرڤان بارزانی له‌گه‌ڵ شاندێكی بانكی نێوده‌وڵه‌تی كۆده‌بێته‌وه‌

WED, 30 JAN 2019 22:59 | KRG Cabinet

ئێواره‌ی ئه‌مڕۆ چوارشه‌ممه‌ 30/1/2019 به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان، پێشوازی له‌ شاندێكی بانكی نێوده‌وڵه‌تی و IFC  به‌ سه‌رۆكایه‌تیی به‌ڕێز مه‌رزه‌ حه‌سه‌ن به‌ڕێوه‌به‌ری جێبه‌جێكار و ڕاگری ئه‌نجومه‌نی كۆمه‌ڵه‌ی بانكی نێوده‌وڵه‌تی كرد.

له‌ دیدارێكدا كه‌ به‌ڕێز قوباد تاڵه‌بانی جێگری سه‌رۆك وه‌زیرانی هه‌رێمی كوردستان ئاماده‌ی بوو، شاندی میوان خۆشحالیی خۆیان به‌ سه‌ردانی هه‌رێمی كوردستان ده‌ربڕی و ده‌ستخۆشییان له‌ حكوومه‌تی هه‌رێمی كوردستان كرد بۆ مامه‌ڵه‌ سه‌ركه‌وتووه‌كه‌ی له‌گه‌ڵ قه‌یرانه‌كانی ساڵانی ڕابردوو كه‌ ئێستا ئاماژه‌كان به‌ره‌و باشبوونی دۆخه‌كه‌ ده‌چن و ئاماده‌ییی خۆیان بۆ هاوكاریكردنی هه‌رێمی كوردستان له‌ بواری ڕیفۆرمه‌ ئیداره‌ییه‌كان و په‌ره‌پێدانی بواری به‌ڕێوه‌بردن و ئابووری و پاره‌داركردنی پڕۆژه‌كانی ژێرخانی ئابووری نیشان دا.

هه‌روه‌ها هه‌ماهه‌نگكاری IFC باسی له‌ پاڵپشتیی حكوومه‌تی هه‌رێمی كوردستان و پرۆژه‌ ستراتیژییه‌كان كرد كه‌ به‌شێكیان له‌لایه‌ن ئه‌وانه‌وه‌ پاره‌دار كراون و له ‌ڕێگه‌ی كه‌رتی تایبه‌ته‌وه‌ ئه‌نجام دراون، ئاماده‌ییی خۆیشی ده‌ربڕی كه‌ پڕۆژه‌ی دیكه‌ی كه‌رتی تایبه‌ت له‌ داهاتوودا پاره‌دار بكه‌ن بۆ ئه‌وه‌ی ژێرخانی ئابووری ببوژێته‌وه‌، هه‌روه‌ها جه‌ختی له‌وه‌ كرده‌وه‌ كه‌ كه‌رتی تایبه‌ت بۆ به‌ره‌وپێشبردنی ئابووری گرنگیی خۆی هه‌یه‌ و ئه‌و پاڵپشتییه‌ش له‌ حكوومه‌تی هه‌رێمی كوردستان بۆ كه‌رتی تایبه‌ت ده‌بینن و پشتگیریی خۆی بۆ ئه‌و سیاسه‌ته‌ی حكوومه‌تی هه‌رێم ده‌ربڕی.

لای خۆیه‌وه‌ به‌ڕێز سه‌رۆك وه‌زیرانی هه‌رێمی كوردستان سوپاسی ئه‌و سه‌ردانه‌ی كرد و دووپاتی كرده‌وه‌ كه‌ حكوومه‌تی هه‌رێمی كوردستان له‌ سیاسه‌تی ئابووریی خۆیدا به‌ پێویست ده‌زانێت كه‌رتی تایبه‌ت ڕۆڵێكی به‌رچاو ببینێت كه‌ هه‌ر ئه‌و كه‌رته‌یه‌ ده‌توانێت ببێته‌ داینامۆی ئابوورییه‌كی به‌هێز و له‌مباره‌یه‌وه‌ حكوومه‌تی هه‌رێمی كوردستان هه‌موو ئاسانكارییه‌ك بۆ كه‌رتی تایبه‌ت ده‌كات و هه‌وڵیش ده‌ده‌ن له‌سه‌ر ڕیفۆرمه‌كان به‌رده‌وام بن به‌مه‌به‌ستی باشتركردنی ئه‌دای حكوومه‌ت و بژێوی هاووڵاتیان و هێنانی سه‌رمایه‌گوزارانی بیانی بۆ هه‌رێمی كوردستان.

له‌ به‌شێكی دیكه‌ی كۆبوونه‌وه‌كه‌دا بارودۆخی ئابووری، دوا پێشهاته‌كان، گفتوگۆكانی نێوان هه‌ولێر و به‌غدا و پرسی یاسای بودجه،‌ خرانه‌ به‌ر باس و گفتوگۆ.
 



بابه‌ته په‌یوه‌ندیداره‌کان